أخبار محلية

يحدث في تونس : تحرّش جماعي بفتاة داخل المترو وسط صمت جميع الركاب (صورة)

نشرت الشابة شيماء الجبالي شهادة حول تعرض فتاة للتحرش الجماعي في الميترو عدد 2 بالعاصمة وسط صمت جميع الركاب خوفا من بطش العصابة التي تتكون من 5 منحرفين قاموا بحصر فتاة في زاوية من زوايا المترو و هذا نص التدوينة

كابوس جديد في مترو عدد 2 هذا الصباح : المترو كان معبي و بما انني نطلع من terminus صار و شديت بلاصة بحذا اخر باب .. المترو بدا يمشي و تلهيت في تاليفوني و نخنتب في حاجة في الكنش الصغير .. حتى لين نسمع مرتين و الا ثلاثة في بكاء خافت جدا .. دورت عيني يمين و يسار في مجال النظر متاعي ما لقيت شي .. في شطر الثنية لتونس سمعت ” لاا اماان هاني ساكتة هاني ساكتة ” وقتها درت و نشوف في برشا ناس و باقي مانيش عارفة الصوت منين .. فرغت البلاصة اللي قدامي قعد فيها راجل كبير و بنتو واقفة بحذاه .. لاحظو اللي انا نلوج على الصوت .. و بعينيهم اشارولي لورايا .. من غير حتى حركة اخرى .. درت ورايا .. نلقا حضبة ..خمسة اولاد .. طول و خشن عاملين سور على طفلة تقريبا معادش تظهر في وسطهم … متركنين بيها وين الباب .. مغطيينها لدرجة انها ما تتراش .. سئلت شفما ياخي منين جاي البكاء !! جاوبني واحد فيهم بالحرف : ” شد بلاصتك و سكر فمك ” وقتها اتأكدت الي فما حاجة و خايبة برشا .. بالوقت ردة فعلي اني نعمل شوهة و نعيط و نلم الناس باش تتدخل معايا .. دوب صار شوية حس في المترو الطفلة ولات تعيط .. ابعدني سيبوني و تدز فيهم باش تتحرك .. الطفلة وجهها ازرق من البكاء و تقريبا النفس مسدود عليها .. قعدناها و هي تبكي و حاولنا نهديوها.. في الاثناء العصابة هاذي قعدت تسب في الناس .. و تقول ما عملنالها شي و تربرب و تخوف في العباد .. حتى لين واحد فيهم جبد دبوزة صغيرة من جيبو ( يدور بينا حد **** نحرقلو وجهو ) و في محطة فلسطين هبطو من المترو و مشاو يجريو .. تتخيلو انسانة دايرين بيها 5 عجولة في مترو .. حاصرينها بيناتهم و هي تبكي و ترعش بالسكات .. مشهد بشع جدا الحقيقة و ما يتنساش ..

زر الذهاب إلى الأعلى